اللى أتكسر عمره ما يتصلح

السلام عليكم ورحمه الله وبركاته
سعات كتير بنقول اللى أنكسر عمره ما يتصلح على حجات كتير فى الحياة
قررت أجرب المثل ده على شوية حجات مادية
عربية او عجله لو أتكسرت مش هتتصلح؟
ممكن تتصلح بس لو حصل فى حاجة جامدة ممكن صعب تبقى زى الأصل
كوباية او فاظة او طبق
ممكن نصلحها ونلزقها بس أكيد شكلها مش هيبقى زى الأول وهنرميها
عظم الانسان
ده بقى لو اتكسر بعد علاج كتير ممكن يتلحم بس مش يرجع زى الاول وممكن مش يتصلح اساسا
نيجى نطبق المثل ده على القلب
حد جرحنا
بس احنا سامحناه
مهما هتعدى السنين والشخص ده هيعتذرلنا ،ورجعنا كلمناه تانى عمر ما مكانته فى قلبنا ما هترجع زى الاول
حد خلانا نقع من نظر نفسنا
وبعدين جه واعتذر عمر ما نظرتنا فى نفسنا هترجع زى الاول
حد غير فى شخصيتنا كتير وبعدين اختفى
هنلاقى نفسنا مش قادرين نرجع زى الاول ومش قادرين نكمل وهنفضل فى النص محتارين وهتبقى شخصيتنا القديمة اتكسرت وصعب نرجعلها والشخصية الجديدة جديدة علينا وصعب نكمل فيها لوحدنا
فيا اما هنحاول وننجح ،ياما هنفشل وهنرجع اسوأ من أى وقت مضى
قلب عرف الطهارة والبراءة والجمال
جه حد لوثه وخلاه قلب حقود فاسد عاصى
حتى لو حاولنا نرجعه زى الاول صعب ولو رجع هيبقى شايل من الماضى
اشياء كتير بتنكسر فى حياتنا وصعب ترجع زى الاول ولكن على الاقل يمكن تجميلها ببعض الاشياء الاخرى لكى نخفى ما بها من كسور وشروخ عشان نقدر نكمل حياتنا ومتقفش عند الحاجة دى

صح ولا حد عنده رأي تانى؟
مع خالص ودى واحترامى لكم